Бусел у клетцы. Так у Шклове ўпрыгожылі горад да «Дажынак»

Да абласнога свята «Дажынкі-2026» у Шклове засталося некалькі дзён. Фестываль-кірмаш працаўнікоў вёскі пройдзе 10 кастрычніка.

Чытайце таксама: «Захаваем Беларусь адзінай»: на сайце Быхаўскага райвыканкама размясцілі малюнак з краінай, разабранай на часткі

Перад святам у горадзе фарбуюць фасады, укладваюць новую плітку, а каля прадпрыемстваў і ўстаноў з’явіліся тэматычныя арт-аб’екты. На іх звярнула ўвагу «Магілёў.медыя».

Кожны калектыў рыхтаваў уласную інсталяцыю. Раённая газета называе іх «асэнсаваным мастацкім выказваннем», у якім адлюстраваліся вытворчыя традыцыі, прафесійны гонар і сувязь пакаленняў.

Адзін з найбольш заўважных аб’ектаў — бусел з распасцёртымі крыламі, змешчаны ўнутр металічнай канструкцыі, якая нагадвае глобус.

Белая птушка стаіць на жалезнай падстаўцы каля будынка з аранжавым фасадам. Сам «глобус» складаецца з металічных дуг, якія імітуюць мерыдыяны і паралелі. Звонку канструкцыю абрамляе вялікая дуга ў чырвона-зялёных колерах.

Бусел даўно ўспрымаецца як адзін з сімвалаў Беларусі, роднага дома і вяртання. Таму яго размяшчэнне ў замкнёнай металічнай канструкцыі выглядае даволі неадназначна. Без дадатковых тлумачэнняў такая кампазіцыя можа ўспрымацца як вобраз абмежаванай прасторы — асабліва калі ўлічыць, што птушка звычайна асацыюецца са свабодай і вяртаннем дадому.

Пры гэтым нельга адназначна сцвярджаць, што аўтары інсталяцыі свядома закладалі ў яе такі сэнс. У апісанні раённай газеты гаворка ідзе пра бусла як пра элемент святочнага афармлення, без згадкі пра метафарычны змест.

Марыа, львы і ўнітазы

Іншыя інсталяцыі таксама могуць уразіць.

Каля «Стройдвора» на каменным пастаменце размясцілі металічную фігуру будаўніка ў белай касцы і зялёным камбінезоне. У адной руцэ ён трымае кельню, у другой — водаправодны кран. Побач стаіць вядро.

Фігура нагадвае Марыа — персанажа вядомай відэагульні Nintendo. Шклоўскі варыянт зроблены з плоскіх металічных элементаў і адрозніваецца ад арыгінальнага героя адсутнасцю вусоў і іншымі дэталямі.

Каля крамы ацяпляльнага абсталявання Teplo-Master BY паставілі двух белых львоў. Яны стаяць па абодва бакі ад уваходу, а за імі ў вітрынах можна ўбачыць рэкламу ўнітазаў, змяшальнікаў і душавых кабін.

Пры гэтым дэкаратыўныя аб’екты не плануюць прыбіраць пасля заканчэння «Дажынак». Паводле задумы, яны павінны застацца часткай абноўленага выгляду Шклова і раёна.

А значыць, бусел у металічнай «клетцы» застанецца каля будынка і пасля свята.

Чытайце таксама: У шклоўскай калоніі палітвязняў караюць за беларускую мову

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро